Ministria e Punëve të Jashtme e Republikës së Kosovës dhe ajo e Republikës së Maltës kanë nënshkruar ripërtrirjen e Kornizës së Bashkëpunimit për vitet 2023-2028. Marrëveshjen, pas konsultimeve, e kanë nënshkruar zëvendësministri i Punëve të Jashtme dhe Diasporës, Kreshnik Ahmeti dhe Sekretari i Përhershëm i Punëve të Jashtme të Maltës, Christopher Cutajar.
Ky dokument mundëson: “Shkëmbimin e informacioneve relevante mes Ministrive të Punëve të Jashtme të të dyja vendeve; “Shkëmbimin e diplomatëve dhe trajnimin e tyre; Thellimin e bashkëpunimit në edukimin profesional, turizëm, kulturë, sport dhe mbrojtje civile; Afrimin e komuniteteve të biznesit, me theks të veçantë të ICT; Bashkëpunimin mes Universiteteve të të dyja vendeve; Shkëmbimin e përvojave dhe trajnimin e stafit shëndetësor dhe; Shkëmbimin e përvojave dhe trajnimin e administratës publike për procesin e integrimit në Bashkimin Evropian”.
Zëvendësministri Ahmeti theksoi se diskutimet e thella në konsultimet e sotme politike dhe Korniza e nënshkruar janë shenja të marrëdhënieve të shkëlqyera mes të dyja vendeve dhe mundësive për thellimin e mëtutjeshëm të tyre. Ai falënderoi Republikën e Maltës për bashkëpunimin dhe mbështetjen e përhershme të Republikës së Kosovës, thuhet në njoftimin për media lëshuar nga MPJD-së.
