F.B.
Është nënshkruar kontrata për rinovimin e stadiumit të qytetit në Gjilan, duke shënuar hapin e parë konkret drejt realizimit të këtij projekti të shumëpritur nga qytetarët gjilanas.
Lajmin e kanë bërë të ditur zëvendësministrja e Kulturës, Rinisë dhe Sportit, Daulina Osmani dhe kryetari i komunës së Gjilanit, Alban Hyseni.
“Gjithçka gati! Stadiumi i Gjilanit po fillon punimet. Sot është nënshkruar kontrata me operatorin ekonomik për ndërtimin e stadiumit të qytetit në Gjilan. Vlera e investimit është 12,783,110 milionë euro. Ky stadium nuk është thjesht një projekt infrastrukturor për Gjilanin, por është pjesë e identitetit të qytetit. Një hapësirë ku gjenerata të tëra janë lidhur me futbollin, emocionin, pasionin dhe historinë”, ka shkruar Osmani.
Sipas saj, pas shumë vitesh ndalesa, mungesë serioziteti dhe profesionalizmi, punimet nisin tash dhe pritet të përfundojnë brenda 24 muajve.
“Projekti ka hyrë në binarë të qartë dhe do të ndiqet me përkushtim nga MKRS dhe të gjithë akterët përkatës. Faleminderit secilit individ, zyrtar shtetëror, komunitetit të futbollit dhe tifozëve për angazhimin dhe këmbënguljen e tyre në realizimin e këtij projekti”, ka shtuar Osmani.
E lidhur me këtë projekt të rëndësishëm për klubet e këtij qyteti dhe në tërësi për infrastrukturën e futbollit në vendin tonë, ka shkruar edhe kryetari i Komunës së Gjilanit, Alban Hyseni, i cili e ka cilësuar këtë projekt si fillimin e një epoke të re për sportin lokal.
“U nënshkrua kontrata për rinovimin e stadiumit të Gjilanit! Shumë shpejt nisin punimet dhe nis edhe një epokë e re për sportin në Gjilan. Urime të gjithë sportdashësve dhe sportistëve, ky është stadiumi që e kemi meritu prej kohësh! Shpejt, shumë shpejt… shihemi në stadiumin e ri!”, ka shkruar Hyseni në Facebook.
Kujtojmë se vetëm disa ditë më parë, kryetari Hyseni kishte bërë të ditur se Organi Shqyrtues i Prokurimit (OSHP) kishte marrë vendimin që zhbllokoi procedurat e prokurimit dhe hapi rrugën për realizimin e këtij projekti madhor. Ai kishte theksuar gjithashtu se stadiumi i ri do të jetë sipas standardeve të UEFA-s.
