Në Hotelin AFA në Prishtinë, janë zhvillua garat e Kampionatit vetjak të Kosovës në shahun rapid.
Në këtë kampionat që po mbahet me moton ” Festivali i shahut” morën pjesë 66 shahistë të cilët garat në shahun rapid i zhvilluan sipas sistemit zviceran me 9 xhiro 10 minuta + 5 sekonda sipas rregullave të FIDE për shahun rapid.
Titullin e kampionit të Kosovës në shahun rapid 2023 e fitoi Mjeshtri Ndërkombëtar Nderim Saraçi , me 8 pikë pa pësuar asnjë disfatë.
Ai shënoi 7 fitore dhe remizime me Muhamet Asllanin dhe Endrit Uruçin. Pas tij u renditën:
Endrit Uruçi dhe Muhamet Asllani me 7,5 pikë, Naim Beqa me 7 dhe Korab Saraçi me 6,5 pikë të cilët u shpërblyen me të holla, medalje dhe diploma. Pesë shahistët më të dalluar u shpërblyen nga Federata e shahut e Kosovës: I 300 euro, II 200, III 100, IV 80 dhe V 50 euro.
U shpërblyen edhe dy shahistë me Elo më të mirë.
Me Elo 1900, Faruk Kurteshi 6 pikë
dhe me Elo 2100, Ahmet Jusufi me 6,5 pikë.
Shpërblimet dhe kupat i ndau, Burhan Misini, sekretar i Federatës së Shahut të Kosovës.
