LDK-ja deklaron se dy herë është rritur çmimi i energjisë, për 2 vjet qeverisje të kryeministrit Albin Kurti. Në konferencë për media, deputeti i kësja partie opozitare, Besian Mustafa, deklaroi se e tëra po ndodhë në këtë kohë krize, kur çmimet e produkteve esenciale janë rritur deri në 50%.
“Kur tatimi në pronë është rritur për 100%, kur pagat nuk janë rritur as në sektorin publik as në sektorin privat dhe kur kursimet pensionale në Trustin pensinal janë zvogëluar për 156 milionë euro”, tha ai.
Sipas Mustafës, duhet shtuar kësaj edhe faktin që vitin e kaluar investimet kapitale ishin realizuar për vetëm rreth 60% ndërsa Qeveria mburret që i kanë tepruar qindra miliona euro dhe krijohet një pamje e qartë e dështimeve ekonomike të kësaj Qeverie dhe të shtrydhjes financiare të familjeve kosovare.
“Për të përkeqësuar edhe më tej gjendjen në sektorin e energjisë, kjo Qeveri për dy vite nuk ka investuar asnjë cent të vetëm në krijimin e kapaciteteve të reja vendore të gjenerimit të energjisë elektrike”, tha Mustafa, sipas të cilit, qindra miliona euro të shpenzuara në subvencionim të çmimit të rritur të energjisë nuk e zgjidhin problemin afatgjatë të energjisë.
“Investimi i këtyre milionave në krijimin e kapaciteteve të reja gjeneruese është e vetmja zgjidhje afatgjatë e qëndrueshme”.
Ai tha se për më keq, procesi i remontit të blloqeve të KEK-ut ishte vonuar shumë gjatë këtyre dy viteve duke ulur ndjeshëm prodhimin vendor dhe duke rritur nevojën për import të energjisë, me çmime tejet të larta.
Ai tha se qeveria nuk mori parasysh as kërkesën e LDK-së për uljen e TVSh-së në faturat e energjisë në 0% deri në tejkalimin e kësaj krize.
“I bëjmë thirrje Qeverisë që sa më parë të fillojë investimet në gjenerimin vendor të energjisë elektrike, veçanërisht nga burimet e ripërtërishme dhe gazit natyror si dhe uljen TVSh-së në faturat e energjisë elektrike në 0% deri në tejkalimin e kësaj krize”.
Ai tha se fatkeqësisht për qytarët, i vetmi vend ku e kanë parë ndryshimin e kësaj Qeverie është në faturat e tyre gjithnjë e më të shtrenjta.
