F.B.
Ylli i Kosovës, Vedat Muriqi, është shprehur i ngazëllyer me fitoren e Dardanëve ndaj Islandës dhe kualifikimin në Ligën B të Ligës së Kombeve.
Kosova mundi Islandën (1-3), të dielën në Murica të Spanjës dhe me rezultatin e përgjithshëm prej 5-0, kombëtraja jonë tashmë është në Ligën B.
Muriqi, i cili ishte protagonisti kryesor në fitoren e Kosovës duke shënuar het-trik duke folur për faqen zyrtare të FFK-së, ka thënë se është i kënaqur që Kosova është kualifikuar në Ligën B.
“Jam shumë i kënaqur që kemi bërë një arritje të jashtëzakonshme me Kombëtare e Kosovës, kemi arritur në Ligën B”, ka thënë Muriqi.
Ai thotë se është i lumtur edhe het-trikun e realizuar kundër Islandës. Muriqi thotë se tashmë Kosova është një ‘arrë e fortë’ për çdo kundërshtar.
“Pastaj nga ana personale një sulmues nuk besoj se mund ta ketë një lojë apo një ditë më të bukur si kjo. Tri gola, het-trik dhe kualifikim që jam shumë i lumtur, por nuk duhet të ndalemi me kaq. Besoj se i kemi treguar edhe Evropës dhe gjitha ekipeve që na përcjellin që jemi bërë një ‘arrë e fortë’ për kundërshtarët, kështu që do të vazhdojmë më punën tonë, me shpirtin tonë luftarak dhe do të luftojmë pamarre parasysh dhe në qershor e kemi miqësoren e pastaj na vijnë kundërshtaret akoma më të vështirë se Islanda”, ka theksuar Muriqi.
