Mediet serbe, gjatë ditës së sotme, kanë raportuar se Milan Radojçiq, së bashku me avokatin e tij, ka qenë në Ministrinë e Punëve të Brendshme të Serbisë për dëshmi.
Arsyeja e kësaj dëshmie vjen pas pranimit nga ana e tij që ka qenë në krye të grupit terrorist serb për sulm ndaj Kosovës, më 24 shtator, ku mbeti i vrarë rreshteri i Policisë së Kosovës, Afrim Bunjaku.
“Milan Radojçiq iu përgjigj ftesës së autoriteteve shtetërore të Serbisë sot në orën 10:00. Ai, i shoqëruar nga avokati i tij, ka hyrë në ambientet e Ministrisë së Punëve të Brendshme, me qëllim që në cilësinë e qytetarit të japë një deklaratë për rrethanat e ngjarjes tragjike në Banjskës, herët në mëngjesin e së dielës, 24 shtator 2023”, thuhet në mediet serbe.
Tutje, thuhet se në formë të raportit do të njoftohet edhe Prokuroria e Lartë Publike në Beograd, e cila do të ndërmarrë masat dhe veprimet e mëtejshme procedurale brenda juridiksionit të saj.
