LeBron James është futur në histori të NBA-së. Ai të martën mbrëma është bërë koshashënuesi më i mirë në histori të ligës më të fortë në basketboll.
Theu rekordin e Kareem Abdul-Jabbarit, që qëndroi për afro 39 vjetë.
Jamesit i duhej të realizonte 36 pikë në ndeshjen e të martës mbrëma kundër Oklahoma Cityt Thunderit, për ta thyer rekordin e Abdul-Jabbarit.
Ai realizoi 38 pikë, shtatë kërcënime e tri asistime, ndërsa Lakersi pësoi 133:130.
James dy pikët, me të cilat theu rekordin, i realizoi 11 sekonda pa mbaruar çereku i tretë, ndërsa ngriti në këmbë gjithë adhuruesit.
James ka realizuar 38.390 pikë në stinor të rregullt në NBA. Abdul-Jabbar gjatë karrierës kishte realizuar 38.387.
“Kurrë nuk kam menduar se dikush do ta thyente rekordin e Kareemit”, ka thënë legjenda e lakersit, Magic Johnson, raporton NBA.com.
James po luan me mesatare prej së paku 25 pikë për ndeshje në karrierën e tij në NBA. Ai është në stinorin e tij të 19-të.
“Urime LeBron për një prej rekordeve më të shenjtëruara të të gjitha sporteve, duke u bërë koshashënuesi më i mirë i NBA-së”, ka thënë komisioneri i NBA-së, Adam Silver. “Është e jashtëzakonshme, LeBroni vazhdon të luajë në nivelin elitar”.
Jamesi është emocionuar pas vendosjes së rekordit.
“Të jem në prezencë të një legjende të tillë si Kareemi do të thotë mjaft shumë. Dua të falënderojë të gjtihë ata që kanë qenë pjesë e këtij rrugëtimi në 20 vjetët e fundit”, ka thënë James.
James ka falënderuar të gjithë në ligën NBA, ndërsa ka shtuar se ishte ëndërr e tij të arrinte një rekord të tillë.
Abdul-Jabbar ka përgëzuar Jamesin për këtë arritje.
“LeBroni është një person që ka planifikuar të dominonte këtë lojë. Ai kishte trupin dhe talentin për të kaluar menjëherë në NBA nga shkolla e mesme dhe ai menjëherë la gjurmë. Ka vazhduar kjo për 20 vjet tash”, tha Abdul-Jabbar.
