F.B.
Vetëm gjashtë federata nga 38 gjithsej sa janë të kategorizuara në Ministrinë e Kulturës, Rinisë dhe Sportit, do të përfitojnë të holla nga buxheti i shtetit.
Federatat e basketbollit, notit, hendbollit, karatesë, pingpongut dhe triatlonit janë të vetmet që e kanë përmbushur obligimin e kërkuar nga MKRS-ja.
Pjesa tjetër, sipas “Kohës”, nuk ka arritur që t’i përmbahen kërkesës së MKRS-së, e cila që nga 3 shtatori i vitit 2024 u ka bërë me dije t’i rregullojnë aktet e tyre normative me Ligjin e Sportit.
“Ju rikujtojmë se pa harmonizimin e akteve tuaja normative me Ligjin për Sport, nuk do të mund të përfitoni mjete financiare nga Ministria e Kulturës, Rinisë dhe Sportit nga procesi i kategorizimit dhe mbështetjes përmes marrëveshjeve të bashkëpunimit sikurse nuk do të mund të lëshohen vërtetime nga Ligji për sponsorizim dhe mbështetje të tjera institucionale. Për këtë arsye, thërrasim që brenda afateve kohore të statuteve të federatave përkatëse të ndërmerrni veprime të nevojshme për harmonizimin e dokumenteve përkatëse dhe të na informoni për përfundimin e këtij procesi. Në të kundërtën, përgjegjësia për pezullimin e sistemit të financimit të sportit/federatës përkatëse, do të jetë në tërësi e juaja përderisa refuzohet potencialisht të zbatohet legjislacioni në fuqi, që sikurse dihet, nuk është çështje zgjidhjeje por detyrimi”, shkruan ndër të tjera në letrën e dërguar të enjten në adresë të federatave sportive të Kosovës, nga MKRS-ja, raportuar nga “Koha”.
Ndër federatat më të mëdha që kanë mbetur pa Ligjin e Sponsorizimit është edhe ajo e futbollit.
FFK-ja nuk ka plotësuar kërkesën e Ministrisë së Sporti, dhe kësisoj nuk mund as të nxjerrë vërtetime për Ligjin e Sponsorizimit.
Ky ligj është jetik për secilën federatë, derisa FFK-ja vitin e kaluar ka qenë federata që ka përfituar më së shumti nga ky ligj.
Për vitin 2024, Federata e Futbollit e Kosovës renditej e para sa i përket shumës së parave të përfituara nga marrëveshjet e sponsorizimit.
Shtëpia e futbollit kosovar kishte të hyra prej 1 milion e 120 mijë eurosh.
Përveç Ligjit të Sponsorizimit, federata përfitojnë edhe nga Kategorizimi i MKRS-së, i cili njëherësh edhe merret me rejtingun e federatave sportive.
Në Kategorinë A janë xhudo, volejbolli e hendbolli.
Ndërkohë, FFK-ja është në Kategorinë B, duke qenë federata me numrin më të madh të sportistëve.
