F.B.
Përfaqësuesja e Maqedonisë së Veriut në futboll me fitore të pritur i ka filluar ndeshjet kualifikuese për Botërorin 2026.
Skuadra e Bllagoja Milevskit mposhti Lihtenshtajnin në Vaduz 0-3 (0-2) duke e marrë kryesimin e grupit. Në minutën e shtatë Maqedonia kaloi në epërsi, me autor Trajkovskin, i cili shënoi gol me kokë. Vetëm katër minuta para fundit të pjesës së parë, Visar Musliu arriti të tundë rrjetën e Lihetshtajnit për herë të dytë.
Pjesa e dytë filloi me iniciativë të madhe të Maqedonisë, ashtu sikurse ishte dhe gjatë gjithë pjesës së parë. Në minutën e 59-të tifozët që mbështenin Maqedoninë, brohoritën “Kocan, Koçan” në shenjë nderimi për 59 viktimat që humbën jetën nga zjarri.
Rezultati përfundimtar 0-3 u shënua me golin e Bojan Miovskit, i cili në minutën e 85-të tregoi se kualiteti i përfaqësueses së Maqedonisë është shumë më i lartë se i nikoqirëve.
Kujtojmë se për Maqedoninë e Veriut luajtën kapiteni Enis Bardhi, Isnik Alimi që pati një super paraqitje dhe kishte notën më të lartë nga gjithë lojtarët, Visar Musli dhe Ezgjan Alioski.
Lojtarët tanë sonte kthehen në Shkup dhe të martën presin Uellsin në ndeshjen e dytë të grupit kualifikues të Botërorit.
