F.B.
Gjatë ditës së sotme është zhvilluar xhiroja e parafundit, apo e 35-ta e këtij sezoni në Superligën e Kosovës.
Kjo xhiro solli dramë e emocione pa fund përgjatë 90 minutave lojë, në të gjitha ndeshjet.
Dukagjini sot do të jetë më i lumturi, pasi e siguroi mbijetesën në Superligë edhe për një sezon, pas fitores ndaj Ferizajt në Klinë, dhe asaj paraprake ndaj Dritës në Gjilan.
Dukagjini arriti fitore, me golat e shënuar nga Dienit Isufi, Hekuran Berisha e Elton Basriu, për 3-1.
Fitore të rëndësishme sot arritën edhe Suhareka e Llapi, që po luftojnë për të mbetur në elitë edhe për një sezon.
Suhareka fitoi si mysafire e Malishevës me shifrat prej 2-1, teksa Llapi triumfoi në Suharekë ndaj Ballkanit. Golin e vetëm të ndeshjes e shënoi Ardit Tahiri i Llapit.
Ndërkohë, fitore po ashtu të madhe mori edhe Prishtina, e cila në sekondat e fundit të ndeshjes iu gëzua golit të Ron Raqit.
Derbi i Anamoravës, Gjilani – Drita u mbyll me shifrat e barabarta prej 0-0, si takimi i vetëm që nuk kishte gola.
Xhiro e fundit do të përcaktojë përfundimisht ekipet që do të dalin në Europë, ato që do të mbesin në ligë pa barazh dhe ato që do të jenë në barazh, së bashku me ekipin që do të bie nga liga.
Tabelës i prin Drita, e cila është edhe kampione e Superligës, e ndjekur nga Ballkani që ka 61 pikë, dhjetë më pak se Drita.
Vendi i tretë i Europës i përket momentalisht Malishevës me 52 pikë, teksa Gjilani është i katërti me 50 pikë.
49 pikë i ka Ferizaj si i pesti, teksa Dukagjini zë vendin e tetë me një pikë më pak.
47 pikë janë në emrin e Prishtinës që është në vendin e shtatë, me tri pikë më shumë se Llapi në vendin e tetë – të barazhit. Vendi i nëntë është i Suharekës me 42 pikë.
Vendi i fundit është i Feronikelit ’74 që ka 15 pikë.
