Lidhja e Shkrimtarëve të Kosovës ka mbajtur takim letrar me anëtarët e rinj, të cilëve iu dorëzuan edhe librezat e anëtarësisë.
Prof. dr. Shyqri Galica, kryetar i LSHK-së, në fjalimin e tij tha se në radhët tyre janë pranuar 13 anëtarë të rinj dhe të paraqitën punimet e tyre.
Aktualisht Lidhja e Shkrimtarëve e Kosovës numëron 319 anëtarë, kurse numri i atyre që janë aktivë është rreth 150.
Kryetari Galica, në këtë manifestim, ka njoftuar edhe për programin e punës për sivjet, me tri programet standarde që me vite organizohen dhe janë bërë tradicionale si: Akademia letrare “Ora e Lirisë”, më 5 mars, me ç’rast jepet çmimi letrar “Adem Demaçi”, festivali ndërkombëtar i poezisë “Drini Poetik”, i cili organizohet më 9-10 qershor, në Prishtinë-Prizren-Kukës për nder të Lidhjes Shqiptare të Prizrenit ku jepen tri çmime letrare “Metafora I, II, III” dhe takimi letrar “Esad Mekuli”, në Prishtinë, më 17 dhjetor.
Pos çmimit letrar “Esad Mekuli”, që dorëzohet për krijimtari të përgjithshme të shkrimtarit, jepen edhe tri çmime letrare “Bardi I, II, III”.
LSHK-ja boton edhe revistën letrare “Metafora” nga viti 2010, ku publikohen punimet e anëtarëve të Lidhjes dhe punime të tjera që i vlerëson redaksia.
Pos këtyre manifestimeve, LSHK organizon edhe veprimtari të tjera, ka një bashkëpunim të mirë pothuajse me të gjitha qendrat kombëtare, sidomos me qytetet Kukës, Shkodër, Përmet, Durrës, Tiranë, Kërçovë, Shkup, Plavë etj. Shpeshherë ata kanë mysafirë edhe nga SHBA-ja, Anglia, Gjermania, Franca, Turqia, Greqia etj.
