Lidhja Demokratike e Kosovës ka njoftuar për një ftesë që e ka marrë nga ambasadori i SHBA-së, Jeffrey Hovenier për të marrë pjesë në takimin e nesërm lidhur me Asociacionin e komunave me shumicë serbe. Sipas LDK-së, qeveria po fshihet prapa akuzave ndaj opozitës.
LDK-ja thotë se në këtë takim “do të konfirmojë edhe njëherë mbështetjen për procesin e dialogut të ndërmjetësuar nga BE-ja, me përfshirjen e plotë të SHBA-së”.
“Orientimet e LDK-së për një marrëveshje përfundimtare, ligjërisht të obligueshme, dhe me njohjen reciproke në thelb të saj, mbesin të pandryshueshme”, thotë LDK-ja.
Në lidhje me Asociacionin, partia më e vjetër në vend “vlerëson se kjo çështje është kompetencë dhe përgjegjësi kushtetuese vetëm e institucioneve të Republikës së Kosovës, në radhë të parë e Qeverisë”.
“Kompetencat dhe përgjegjësitë kushtetuese nuk kanë alternativë, prandaj LDK-ja, në rolin e saj opozitar, s’ka se si t’i ushtrojë ato. Opozita nuk mund t’i marrë përgjegjësitë e shumicës dhe as të Qeverisë së kësaj shumice. Prandaj pjesëmarrja e institucioneve shtetërore në këtë proces është domosdoshmëri e pazëvendësueshme”, thuhet në komunikatën e LDK-së.
LDK-ja i bën thirrje Qeverisë së Kosovës “që të mos fshihet prapa akuzave populiste ndaj opozitës, por të ushtrojë përgjegjësitë e saja si shumicë dhe të trajtojë këtë çështje në përputhshmëri me Kushtetutën dhe ligjet e Kosovës si dhe në koordinim të ngushtë me aleatët tanë”.
