Kanë përfunduar në kushtetuese ndryshimet në Ligjin për Zyrtarët Publik që u bënë më 30 tetor të këtij viti në Kuvendin e Kosovës. Këto plotësim ndryshime dërguan në Gjykatën Kushtetuese Armend Zemaj e Shkëmb Manaj të LDK-së.
Pasi deponuan kundërshtimin e tyre në organin më të lartë kushtetues në vend, deputeti Armend Zemaj tha se këtë e bënë për të parandaluar, siç tha ai, kapjen e administratës publike nga pushteti aktual.
Sipas tij, politizimi jo vetëm që e dëmton administratën në tërësi, por edhe ecjen e Kosovës në rrugën evropiane.
“LDK mendon që nuk duhet lejuar të ketë një administratë tërësisht të politizuar, sidomos një administratë që është investuar shumë të jetë e pavarur e t’i ushtrojë detyrat e tyre sipas ligjeve e Kushtetutës së Kosovës. Në kuptimin e saj, të jetë vazhdimësi me performancë të mirë e jo vazhdimësi e tendencës së subjekteve politike të kemi politizim dhe dëmtim, mbi të gjitha për interesa klienteliste e me afera të mëdha korruptive siç ka ndodhur në këto katër vite të këtij pushteti”, tha para gazetarëve Zemaj.
Tutje, deputeti nga LDK-ja tha se presin nga kushtetuesja një verdikt plotësisht mbi atë siç është kundërshtimi i tyre si opozitarë.
“Besojmë dhe shpresojmë të kemi një verdikt plotësisht në atë që ne kemi kundërshtuar duke pasur për bazë që nuk janë marr për bazë vërejtjet e Këshillit të Evropës e as Komisionit të Venecias dhe kjo është për të ardhur keq se në çfarë mënyre ka insistuar dhe insiston ky pushtet të politizojë administratën në Republikën e Kosovës”, tha ai.
