F.B.
Përfaqësuesi i posaçëm i BE-së për dialogun Kosovë-Serbi, Mirosllav Lajçak, e ka vlerësuar të rëndësishëm takimin e sotëm me presidentin e Serbisë, Aleksandar Vuçiq në Beograd.
Lajçak qëndroi në kryeqytetin serb, dy ditë pas takimit që pati me kryeministrin e Kosovës, Albin Kurti në Bled të Sllovenisë.
Të dyja këto takime janë pjesë e përgatitjeve të takimit të ardhshëm të nivelit të lartë në kuadër të dialogut ndërmjet dy vendeve në Bruksel.
“Sot në Beograd kam pasur diskutime thelbësore me presidentin e Serbisë, Aleksandar Vuçiq për takimin e radhës të nivelit të lartë në shtator, për përpjekjet për uljen e tensioneve dhe mbajtjen e zgjedhjeve të reja lokale në veri të Kosovës, si dhe zbatimin e të gjitha Marrëveshjeve të Dialogut”, ka shkruar Lajçak në rrjetin social “X”.
Ndërkaq, rreth këtij takimi përmes një deklarate në ‘Instagram’ presidenti serb ka thënë se ia ka shprehur shqetësimin e tij të madh Lajçakut për siç ka thënë “zhvillimin e ngjarjeve në Kosovë dhe planin e Kurtit që me forcë ta okupojë veriun e Kosovës, si dhe dëbimin e serbëve nga vatrat e tyre shekullore”.
Kurti dhe Vuçiq për herë të fundit janë takuar më 2 maj, teksa Bashkimi Evropian së fundmi ka përsëritur thirrjen për Kosovën dhe Serbinë që të krijojnë kushte për vazhdimin e dialogut për normalizimin e raporteve.