Emisari special për dialogun mes Kosovës dhe Serbisë, Miroslav Lajcak, në një intervistë, që, siç raporton Danas, do të transmetohet në televizionin publik serb, ka folur për parakushtet për zbatimin e propozimit evropian, duke përmendur formimin e Asociacionit të komunave me shumicë serbe si kryesorin.
Lajcak ka thënë se nëse shihni propozimin evropian, ai flet për normalizim, e jo për ndonjë lloj kapitullimi.
Emisari special ka përsëritur në disa raste se Asociacioni duhet të formohet, dhe, sic e citon gazeta serbe, ai ka theksuar se “nëse s’ka Asociacion, nuk ka marrëveshje”.
Qëllimi, thotë Lajcak, nuk është që dikush të fitojë ose të humbë. “Qëllimi është që të shikohet për një situatë ‘win-win’ dhe të hapet dera evropiane”.
Lajcak tutje ka thëë se takimi në Ohër ka për qëllim që të arrihet pajtim për përmbushjen e marrëveshjes, e cila ka përkrahjen e BE-së që ai thotë se nuk e mban mend të ketë pasur në të kaluarën një mbështetje të tillë.
Lajcak po qëndron në këtë fillimjavë në Beograd, ndërsa të premten dhe të shtunën që shkoi ka qëndruar në Prishtinë. Këto vizita i ka realizuar para takimit të 18 marsit që mbahet në Ohër.
