Kryeministri i Kosovës, Albin Kurti ka reaguar në `Twitter` pas vendimit nga MINT për pezullimin e certifikatës së Klan Kosovës. Ai ka thënë se rregullat e regjistrimit të biznesit janë detyrim ligjor dhe jo çështje ligjore. Tutje ka shkruar se demokracia sulmohet kur biznesmenët e shkelin ligjin për përfitime financiare.
“Liritë e medias janë jetike: një sulm ndaj tyre është një sulm ndaj demokracisë. Por demokracia gjithashtu sulmohet kur biznesmenë të fuqishëm shkelin ligjin për përfitime financiare. Dhe zbatimi i ligjit kundër shkeljeve të njerëzve të tillë – në asnjë mënyrë – nuk përbën një sulm ndaj lirisë së medias”, ka shkruar Kurti.
Tutje ka përmendur se në Kosovë operojnë 468 biznese të regjistruara si media, ndërkaq 114 janë të lincensuara si kompani që ofrojnë shërbime audiovizive dhe të audios.
“Ndjekja e rregullave të regjistrimit është detyrë ligjore, jo një ‘teknikialitet’. Dhe zbatimi i rregullave të tilla kundër një shkelësi të vetëm nuk kërcënon pluralizmin mediatik. Në demokraci, organet e autorizuara për të vendosur për raste të tilla nuk qëndrojnë në Zyrën e Kryeministrit. Megjithatë, këto organe kanë mbështetjen e plotë të Zyrës sonë në kryerjen e detyrave të tyre, përballë interesave të fuqishme të biznesmenëve të pasur të rreshtuar kundër tyre”, ka thënë Kurti.
Ministria e Industrisë, Ndërmarrësisë dhe Tregtisë bëri të ditur se Komisioni për Shqyrtimin e Ankesave për Regjistrimin e Bizneseve ka marrë dje vendim për refuzimin e ankesës së Shoqërisë Tregtare “Klan Kosova sh.p.k.”. Ndaj këtij vendimi ka pasur reagime të shumta nga mediat, shoqëria civile, por edhe diplomatët e angazhuar në Kosovë.
