Kryeministri Albin Kurti në mbledhjen komemorative të organizuar në nderim të heroit të Republikës së Kosovës, Afrim Bunjaku, tha se nga rasti i vrasjes së tij asgjë nuk është njësoj dhe se e vërteta ka dalur para syve të ndërkombëtarëve. Vrasjen e tij kryeministri e cilësoi si sulm ndaj shtetit të Kosovës.
Ai ka thënë se dita e sotme është ditë zie për shkak të pikëllimit dhe dhembjes ndaj humbjes së rreshterit të Policisë së Kosovës. Por në të njëjtën kohë është edhe dita kur iu bëhen nderimet më të larta shtetërore Bunjakut.
“Bashkë me pikëllimin dhe dhembjen, ndjejmë krenari dhe besim për Afrimin dhe për të gjithë policët e Policisë së Kosovës; për policinë tonë që me veprimet e saj profesionale dhe të guximshme dje e pamundësuan një skenar më të gjerë kriminal e terrorist”, u shpreh ai.
Kurti tutje tha se “Afrim Bunjaku u vra gjatë një sulmi ndaj policëve të Kosovës dhe ndaj vetë shtetit tonë, nga një grup personash shumë të armatosur dhe të pajisur rëndë, të trajnuar profesionalisht dhe me plan, të përkrahur politikisht, të financuar materialisht dhe të mbështetur logjistikisht nga Serbia”.
“Nga dje, asgjë më nuk mund të jetë njësoj: faktet dolën sheshazi përballë nesh, në sytë tanë dhe të bashkësisë ndërkombëtare si dhe në sytë e secilit që ka kurajo dhe vullnet për ta parë të vërtetën e rajonit në të cilin jetojmë”, u shpreh Kurti.
Tutje kryeministri çmoi kontributin e policëve të vendit, me punën e të cilëve, sipas Kurtit, u eliminuan disa terroristë kriminelë.