Pasi foli për rëndësinë historike të ngjarjes së Lidhjes së Prizrenit, kryeministri Kurti vuri në pah ngjashmëritë e problematikës, sikundër atëherë, ashtu edhe sot, duke vënë theksin te Rusia.
“10 Qershori është po aq i rëndësishëm sa 28 nëntori dhe 17 shkurti në historinë tonë kombëtare”, deklaroi Kurti, derisa shtoi se kjo datë konsiderohet si një fillim i një udhëtimit të strukturuar politik të shqiptarëve, i cili vazhdon edhe sot.
“Ne ende kemi çka të mësojmë nga filozofia politike të Sami Frashërit dhe nga praktika diplomatike e Abdyl Frashërit, nga organizimet ushtarake e Sylejman Vokshit e Ali Pashë Gusisë”, tha kryeministri Kurti, duke vazhduar më tutje, se rruga e jonë e tashme është rrugë e dikurshme e Lidhjes së Prizrenit.
“Me rëndësinë e saj politike e historike ‘Lidhja e Prizrenit’ na ka bashkuar edhe ne si krerë institucionesh sikurse që ka bashkuar parinë shqiptare atëherë”, shtoi Kurti.