Presidentja Vjosa Osmani, kryetari i Kuvendit, Glauk Konjufca dhe kryeministri, Albin Kurti kanë nënshkruar aplikimin e Kosovës për anëtarësim në Bashkimin Evropian. Ata e vlerësuan si ditë historike dhe si një lëvizje drejt jetësimit të ëndrrës së kahmotshme të popullit të Kosovës. Në një fjalë rasti, Osmani ka thënë se me nëshkrimin e aplikimit Kosova po shkon një hap më afër drejt Bashkimit Evropian.
“Nga sot, 14 dhjetori ka një rëndësi të dyfishtë në historinë moderne të Kosovës. Në njërën anë po shënojmë aplikimin për anëtarësim në BE dhe në anën tjetër kemi përvjetorin e Ushtrisë së Kosovës. Së bashku me Konjufcën dhe Kurtin, në emër të Republikës së Kosovës po marrim një hap vendimtar drejt jetësimit të ambicies sonë të patjetërsueshme. Ne sot po e sjellim Kosovën një hap më afër BE”, tha ajo.
