Kryetari i PDK-së Memli Krasniqi ka reaguar pas djegies së objektit të Institutit të mjekësisë Ligjore.
Ai përmes një postimi në llogarinë e tij në Facebook, ka pyetur se si ka mundësi brenda vitit dy herë të dëmtohet objekti I IML-së, madje ai rastin e sotëm e ka lidhur me zhdukjen e mostrave të Astrit Deharit.
Krasniqi ka kërkuar nga të gjitha organet kompetente që urgjentisht të hedhin dritë mbi këtë çështje, duke shtuar se Ministria e Drejtësisë, e cila menaxhon me këtë Institut, duhet të dalë urgjentisht me informata konkrete rreth këtij rasti.
“Çfarë e shkaktoi zjarrin? Çfarë u dogj dhe cilat janë dëmet? A janë dëmtuar prova dhe mostra të tjera, të cilat do të dëmtojnë hetimin e ndonjë rasti? Si është e mundur që edhe pas zhdukjes së mostrave të rastit Dehari, mbikëqyrja dhe niveli i sigurisë në këtë Institut të mbeten kaq të ulëta?”, ka shkruar Krasniqi.
Tutje ai ka thënë se mungesa e mbrojtjes së Institutit të Mjekësisë Ligjore, edhe pas dështimeve të kaluara, nuk mund të quhet më as papërgjegjësi dhe as rastësi.
“Tashmë, dyshimet janë edhe më të mëdha se, për qëllime të caktuara të pushtetit aktual, ky Institut është rikthyer në cak dhe në instrument politik. Dikush duhet të jap përgjegjësi!” ka thënë ai.
