Veriu i Kosovës, përkatësisht zhvillimet e fundit atje, janë përmendur nga zyrtarë të Bashkimit Evropian, të cilët kanë folur rreth nënshkrimit të një deklarate ndërmjet BE-së dhe NATO-s për një bashkëpunim më të afërt strategjik. Sipas zyrtarëve evropianë, angazhimet drejt shtendosjes së situatës në veri të Kosovës janë shembulli më i mirë praktik i bashkëpunimit mes BE-së dhe Aleancës Veri-Atlantike.
Zëdhënësi i Bashkimit Evropian, Peter Stano ka deklaruar se konteksti aktual gjeostrategjik i bashkëpunimit në mes të bllokut evropian dhe Aleancës Veri-Atlantike është tejet i rëndësishëm dhe relevant si asnjëherë më parë.
Angazhimet drejt shtendosjes së situatës në veri të Kosovës, sipas Stanos, është shembulli më i mirë praktik i bashkëpunimit në mes të BE dhe NATO-s.
“Rasti i fundit ishte në veri të Kosovës në periudhën në mes të Krishtlindjeve dhe Viti të Ri, kur BE-ja dhe NATO u koordinuan ngushtë në terren. Po ashtu jemi të koordinuar dhe po punojmë shumë ngushtë edhe në kontekstin e agresionit ilegal rus ndaj Ukrainës”, kak nënvizuar Stano.
Zëdhënësi i Bashkimit Evropian i ka bërë këto cilësime duke i pyetur se kur NATO dhe BE do nënshkruajnë deklaratën e përbashkët, të shumëpritur e që ka të bëjë me luftën në Ukrainë.
Nënshkrimi i kësaj deklarate pritet të ndodh tash e sa muaj dhe e njëjta do jetë thirrje e përbashkët Rusisë që të ndalojë luftën e saj dhe të largohet nga Ukraina.
Teksti i deklaratës është dakroduar gjatë vitit 2022 mirëpo miratimi ka pasur ngecje në dritë të tensioneve në mes të Qipros si anëtare e BE-së dhe Turqisë si anëtare e NATO-s.
“Sigurisht se është e rëndësishme nënshkrimi i një deklarate të përbashkët, dhe presim të ndodhë kjo sa më shpejt të jetë e mundur”, ka thënë Stano, zëdhënës i Bashkimit Evropian.
Formalizimi i tekstit të deklaratës së përbashkët do të përfaqësonte një arritje të konsiderueshme diplomatike, duke pasur parasysh muajt e angazhimeve që u deshën për të arritur deri te ky moment.
