Deri tani Prokuroria Speciale e Kosovës ka ngritur 33 aktakuza për krime lufte, në të cilën janë akuzuar 89 persona.
Këto statistika janë bërë të ditura sot në një konferencë për media nga Prokuroria Speciale e Kosovës lidhur me ngritjen e aktakuzave për krime të luftës.
Prokurorja Drita Hajdari tha se ka vështirësi pasi të dyshuarit për krimet e luftës gjenden në Serbi, ndërsa viktimat në Kosovë, por kjo nuk e ka ndaluar Prokurorinë të marrë dëshmi dhe prova për këto raste.
“Deri më tani prokurorët vendorë kanë ngritur 33 aktakuza me 89 persona të akuzuar. Me marrjen e kompetencave ishim ballafaquar me probleme të shumta, sidomos me rrethanën se kryesit e këtyre veprave penale nuk janë në Kosovë, ishin në Serbi dhe viktimat janë në Kosovë. Për këtë ne nuk kemi mund të ngremë aktakuza pa i marrë në pyetje të pandehurit, por kjo nuk na ka ndalur që të sigurojmë prova, të intervistojmë dëshmitarët, madje kemi siguruar edhe prova nga Tribunali Ndërkombëtar Penal për ish-Jugosllavinë”, tha Hajdari në konferencën për media.