Misioni i KFOR-it e ka mirëpritur vendimin e institucioneve në Kosovë për të reduktuar praninë e Policisë së Kosovës rreth ndërtesave komunale në veri.
Nëpërmjet një komunikate për media, KFOR-i ka thënë se vendimi i marrë në një takim teknik të mbajtur nga Policia e Kosovës, EULEX-i dhe KFOR-i, është një hap i rëndësishëm drejt uljes së tensioneve dhe promovimit të dialogut.
“Në këtë drejtim, KFOR-i pajtohet se ka pasur një përmirësim në situatën e sigurisë në atë zonë në Kosovë, por është e rëndësishme të sqarojmë se pikëpamja jonë nuk është rezultat i një aktivitetit të përbashkët vlerësues. Një vlerësim i përbashkët, në fakt, është një procedurë e ndryshme që kërkon veprime specifike, disponueshmëri të dhënave dhe vlerësime sistematike në të cilat roli i KFOR-it, siç është rënë dakord ndërmjet NATO-s dhe BE, duhet të konsiderohet vetëm si i përshtatshëm dhe t’i nënshtrohet miratimit të Komandantit i KFOR-it”, thuhet në komunikatë.
Tutje theksohet se misioni i KFOR-it i drejtuar nga NATO-ja mbështet plotësisht dialogun e ndërmjetësuar nga BE dhe mbetet në kontakt dhe koordinim me të gjithë bashkëbiseduesit vendorë dhe ndërkombëtarë.