Instituti Demokratik i Kosovës (KDI) ka kërkuar nga Qeveria e Kosovës që të jetë më transparente në çështjen e dialogut me Serbinë.
Sipas tyre me vizitat e shpeshta të emisarëve special nga SHBA-ja dhe BE-ja dëshmojnë se ka një dinamikë të shtuar në dialogun Kosovë-Serbi.
KDI-ja vlerëson se Qeveria po tregon mostransparencë të theksuar për propozimin franko-gjerman, i cili është ndër çshtjet më të rëndësishme mediatike kohëve të fundit.
“Duke qenë i mbyllur dhe i reduktuar, ky proces çdo ditë e më tepër po krijon hapësirë për dezinformim, pasiguri dhe ulje të besimit të publikut. Informacionet selektive dhe deklaratat e kufizuara të emisarëve ndërkombëtarë mbeten burimet e vetme të informacioneve, ndërkohë që Qeveria po shmang adresimet për publikun.Meqë përmbyllja e dialogut Kosovë-Serbi është çështje e interesit nacional, pritjet tona janë që edhe subjektet politike opozitare të tregohen të përgjegjeshme dhe serioze në përpjekjet e tyre për ta mbajtur Qeverinë llogaridhënëse dhe për të ofruar kapacitetet e tyre në formësimin e qëndrimeve sa më konsensuale të palës kosovare. Në këtë drejtim, opozita përmes praktikave dhe instrumenteve kushtetuese parlamentare, do të duhej të ftonte Kryeministrin në raportim në një seancë të jashtëzakonshme të Kuvendit, në lidhje me zhvillimet në procesin e dialogut”, thuhet ndër të tjera në komunikatë.
