Policia e Kosovës ka konfirmuar bastisjet në pronat e bosit shqiptar të drogës Princ Dobroshi. Në komunikatën e policisë është bërë e ditur se janë bastisur dy objekte banimi të të dyshuarit në qytetin e Pejës dhe se gjithashtu pjesë e operacionit kanë qenë edhe hetuesit gjermanë.
Në këtë operacion janë kryer bastisje në dy lokacione, në një banesë dhe shtëpi banimi të personit të dyshuarit i cili ishte arrestuar në Shqipëri më datë 22.11.2023.
Por kush është Princ Dobroshi?
Në krye të kartelës kriminale të Dobroshit sigurisht qëndron rasti i planifikimit të kidnapimit të princit të Norvegjisë në vitin 1999, por kjo jo se veprat e tij të tjera janë më të lehta.
Princ Dobroshi ka lindur më 2 prill 1964 në Pejë. Si adoleshent, ai përshkruhet si një ‘hajdut i aftë’ dhe më vonë migroi në Evropë duke krijuar lidhjet e tij në shumë vende.
Në vitin 1993 ai u kap në Norvegji dhe më 1994 u dënua me 14 vite burg për trafik heroine, ndërsa akuzat e tjera ishin në pritje në Suedi dhe Danimarkë.
Në një aksion të koordinuar mirë, ai u arratis nga burgu në Ullersmo në vitin 1997. Ai u transferua në Çeki ku grupi i tij shpejt mori kontrollin dhe dominimin në trafikun e drogës.
Një ngjarje, që për shumë njerëz mund të jetë e panjohur, ka ndodhur më 1999 kur ishte tentuar të kidnapohej atëherë Princi Haakon i Norvegjisë, atëherë 26 vjeçar.
Tentim-kidnapimi është mbajtur i fshehtë për një kohë të gjatë, dhe ende nuk dihen shumë detaje.
Së paku jo deri më 2000, një vit pasi tentimi për kidnapim u zbulua në një biografi të re mbi babanë e Princit Haakon, Mbretin Harald. Por, kush mund të ketë qenë i interesuar të kidnaponte Princin Haakon? Në të vërtetë, ishte mafia kosovaro-shqiptare që bëri plane për të kidnapuar trashëgimtarin norvegjez.
Më 23 shkurt 1999 ai u arrestua në Pragë. Më 6 shtator 2000 ai do të merrej në pyetje nga gjykata në Ringerike, për shkak të sigurisë së lartë.
Marrja në pyetje u anulua pasi autobusi në të cilin ndodheshin anëtarët e gjykatës u përplas me një kamion ku humbën jetën 3 persona.
Nëntoka kriminale kishte planifikuar sulm të armatosur në burgun e Pakracit, por në gusht të vitit 1999, Dobroshi u ekstradua në Norvegji për të përfunduar dënimin.
Ai u lirua me kusht dhe u dëbua për “sjellje të mirë” në janar të vitit 2005. Më pas u kthye në Çeki dhe qëndroi atje për tre muaj, derisa i mbaroi viza. Më vonë u kthye në Pejë të Kosovës.
Ai kishte pranuar miqësinë e tij me Arfan Qadeer, i cili u arrestua në Norvegji me akuzën se planifikonte të terrorizonte ambasadat izraelite dhe amerikane në Oslo të Norvegjisë.
Që nga shtatori 2006, ai jetonte në Kosovë, ndërsa gruaja e tij dhe dy fëmijët e tyre jetonin në Pragë.
Një hetim i të dyshuarve për terrorizëm në Norvegji në shtator të vitit 2006 zbuloi kontakte ndërmjet njërit prej të dyshuarve dhe Dobroshit që ata takuan në Prishtinë në vitin 2005. MF Dnes, një gazetë çeke, spekuloi për mundësinë e hakmarrjes së Dobroshit dhe organizimit të një sulmi terrorist në Pragë.
Në një intervistë të nesërmen, Dobroshi pranoi se njihte personin, por mohoi çdo përfshirje. Që atëherë, ai kishte jetuar në Kosovë, duke përdorur kontaktet që kishte krijuar në hierarkinë e botës së krimit.
