Letrat e urimit për 16 vjetorin e pavarësisë së Kosovës që mori presidentja Vjosa Osmani nga liderët e vendeve të përfshira më intensivisht në dialogun Kosovë-Serbi u shoqëruan me paragrafë që nxisin Kosovën të përparojë më shumë në këtë proces. Më i drejtpërdrejtë në këtë ishte presidenti i Francës, Emmanuel Macron, i cili përmendi edhe afate kohore.
Nuk dha një datë të caktuar, por presidenti francez paralajmëroi se “javët e ardhshme” duhet të ketë rezultate konkrete nga ana e Kosovës.
“Javët e ardhshme do të jenë vendimtare për zbatimin e të gjitha dispozitave të marrëveshjes Bruksel-Ohër, duke përfshirë edhe themelimin e Asociacionit të komunave me shumicë serbe, e cila në veçanti përfshin organizimin e zgjedhjeve te reja lokale me pjesëmarrjen e serbëve. Unë shpresoi që Kosova të marrë vendimet e guximshme që janë të nevojshme dhe që do t’i mundësojë të përparojë në trajektoren e saj europiane”, ka shkruar Macron në letrën drejtuar Osmanit për 17 shkurt.
Ai u përpoq ta përshkruajë edhe sfondin e ngjarjeve në botë për të bërë me dije se krerët kosovarë duhet të nxitojnë.
“Sfidat për kontinentin tonë do të jenë të shumta në vitin 2024, derisa lufta e agresionit nga Rusia po vazhdon në Europë dhe stabiliteti i Lindjes së Mesme po kërcënohet seriozisht. Në këtë kontekst shumë të pasigurt ndërkombëtar, normalizimi i marrëdhënieve ndërmjet Serbisë dhe Kosovës përbën një sfidë parësore”.
Meqë Macron nuk dha një datë konkrete, nënkryetari i Lidhjes Demokratike e Kosovës, Lutfi Haziri, doli me një numër ditësh sa ka afat Kosova, sipas tij.
“BE-ja dhe SHBA-ja janë mobilizuar me mbyllë këtë çështje të obligimit të Kosovës me ndihma të mëdha njerëzore, financiare edhe humane për 45 ditë dhe Kosova me marrë kreditin e madh, sepse Serbia obligohet me marrë veprime”, ka thënë Haziri në Tëvë 1.
Për heqjen e masave ndaj Kosovës, Haziri ka thënë se Borrell e Lajçak janë angazhuar për heqjen e masave ndaj Kosovës, por që nuk kanë gjetur mbështetje nga partnerët.
Ai duke komentuar raportet e Kosovës me aleatët ndërkombëtarë sidomos pas vendimeve të fundit të Qeverisë për çështjen e dinarit, tha se Bashkimi Evropian e ka vendosë Kosovën në marrëdhënie të kufizuara, derisa Shtetet e Bashkuara të Amerikës kanë kufizuar funksionarët qeveritarë.
Haziri tha se aleatët ndërkombëtarë tashmë janë duke parë mundësinë nëse do të ketë zhvillime pozitive nga ana e Kosovës në javët në vazhdim, pasi, sipas Hazirit, nëse ndodh e kundërta atëherë do të hyjnë në fuqi pakoja e dytë e masave ndëshkuese për Kosovën.
