F.B.
Superliga e Kosovës rikthehet sot me dy ndeshje të rëndësishme në xhiron e 27-të.
Ekipet po hyjnë në fazën vendimtare të sezonit dhe çdo pikë është jetike në garën për titull, për Europën dhe për mbijetesë.
Një sfidë e zjarrtë pritet në Drenas, ku Feronikeli 74 do të presë Dritën. Vendasit do të kërkojnë të përfitojnë nga mbështetja e tifozëve për të siguruar një rezultat pozitiv, ndërsa Drita synon tri pikët për të vazhduar si lider i padiskutueshëm.
Me sulmues të rrezikshëm dhe një mesfushë kreative, Drita shihet si favorite, por Feronikeli ka treguar se mund të surprizojë kundërshtarët dhe po respekton kampionatin, ndonëse gjasat për mbijetesë tashmë janë shuar.
Një tjetër përballje emocionuese do të zhvillohet në Malishevë, ku skuadra vendase do të presë Prishtinën.
Malisheva ka qenë një ekip i fortë këtë sezon ndërsa Prishtina, me historinë dhe përvojën e saj, kërkon të rikthehet te rezultatet pozitive për të qëndruar në garë për objektivat sezonalë.
Ky duel pritet të jetë mjaft i luftuar, me të dyja skuadrat që do të kërkojnë maksimumin.
