Sot në Helsinki është zhvilluar ceremonia e varrimit të ish-Presidentit të Finlandës Marti Ahtisaari. Nga Kosova atje me ftesë të qeverisë finlandeze kanë marrë pjesë Presidentja Vjosa Osmani dhe ish-Presidenti Fatmir Sejdiu. Gazeta finlandeze Helsinki Sanomat ka shkruar sot se Ahtisaari Çmimin Nobel për Paqe në vitin 2008 e mori është ndoshta në një masë falë edhe operacionit në Kosovë.
Kjo gazetë rikujton se Ahtisaari dhe i dërguari special rus Viktor Chernomyrdin detyruan liderin serb Slobodan Millosheviç që ta pranojë paqen në vitin 1999 dhe Ahtisaari u bë një hero evropian i paqes.
“Unë tashmë e njihja atë që nga ditët e OKB-së,” thotë ish-presidentja e Irlandës, Mary Robinson, e cila mori pjesë në funeral.
“Por më kujtohet që u impresionova për herë të parë në vitin 1999. Në atë kohë, unë isha komisionere e OKB-së për të drejtat e njeriut dhe takova shumë refugjatë që ikën nga Kosova. E pashë vetë se sa e rëndësishme ishte ndërhyrja e tij.”
“Ai ishte një person shumë i ngrohtë, i sjellshëm dhe modest, duke pasur parasysh se për punën e tij fitoi çmimin Nobel për Paqe”, vazhdon Robinson.
