Ish-drejtori i Përgjithshëm i Radio Televizionit të Kosovës, Mentor Shala, ka reaguar pasi Rilind Gërvalla, një nga donatorët dhe aktivistët e Lëvizjes Vetëvendosje u zgjodh në pozitën e drejtorit të RTK-së për kanalet në gjuhën shqipe.
Ai tha se nuk ka dashur të flas për RTK-në, por ‘detyrohet’ t’i thotë disa fjalë.
“Krejt çasja që po bahet është e gabueshme! Po sulmohet biri para babës që është i zoti i shpisë!!! Drejtor Gjeneral (i zoti i shpisë) është Shkumbin Ahmetxhekaj e ’baba’ i tij është Besnik Boletini kryetar i Bordit. E ju kolegë të nderum e sulmoni Rilind Gërvallën! Kush e pruni Shkumbin Ahmetxhekajn në krye të RTK? A keni hulumtu? A e keni vet Flutra Kusarin për këtë punë? A e keni vet Vjosa Osmanin, përndryshe presidenten për këtë punë?”, shkroi ai në Facebook.
Sipas tij, drejtori Ahmetxhekaj është i dekretuar nga pushteti për me qenë drejtor gjeneral i televizionit publik.
“Edhe ne cilën odë e di ku është vendos që ai me qenë Drejtor Gjeneral! Edhe cili deputet ka qenë ‘veza’ (lidhja) që e ka kry këtë punë. E msit i kësaj pune ka qenë Driton Hetemi e Besnik Boletini në odën e një deputeti të VV. Prandaj, kolegë të dashtun mos ju gjuni në qafë Rilindit se ai tek e fundit është Drejtor i TV e jo Drejtor Gjeneral dhe nuk i ka përgjegjësitë kryesore për RTK”, shtoi ai.
Madje, ai e ka quajtur psikopat Arsim Halilin, i cili ishte u.d. zv/drejtor i RTK-së, duke thënë se bashkë me Ahmetxhekajn i kanë larguar 250 persona nga puna dhe pretendon se i kanë keqpërdorur 400 mijë euro.
“Shkumbini bashkë me atë psikopatin dostin e tij Arsimin i kanë qit prej pune mbi 250 vet, kryesisht raste sociale, janë tu i terrorizu krejt punëtorët e RTK, kanë keqpërdorë me rreth 400 mijë euro me procedura të negociueme të prokurimit, e kanë humb pronën e RTK-së të dhurume prej Qeverisë prej 8h tokë afër Pallatit të Drejtësisë, kanë detyru punëtorët me fallsifiku dokumenta zyrtarë e shumë e shumë keqpërdorime tjera”, vijoi Shala.
“Rilindi ka mujt me qenë aktivist po së paku i sinqertë, e klani Shkumbin, Arsim, Flutra Kusari, Festim Kabashi e Gentiana Begolli përveç që janë emisarë politikë të Vjosa Osmanit janë edhe akterët kryesorë të shkatërrimit të RTK-së! Rilindi është njeri para së gjithash! Bindjet e tij politike i përkasin vetëm atij”, përfundoi ai.
