F.B.
Mbrojtësi i Llapit, Ilir Blakçori është shpallur “Ylli i Javës” për xhiron e tretë të Superligës nga Federata e Futbollit e Kosovës.
Ai në ndeshjen kundër Fushë Kosovës përveçse ishte stabil në mbrojtje u shfaq shumë i dobishëm edhe në fazën e sulmit, teksa shënoi një gol, duke ia mundësuar Llapi arkëtimin e 3 pikëve të radhës në këtë edicion të ri të elitës së futbollit kosovar.
Pasi mori këtë çmim, Blakçori u shpreh i lumtur që skuadra e tij shënoi fitore dhe që ai u vlerësua me çmimin e më të mirit të javës.
“Është kënaqësi të shpallesh më i miri i xhiros. Për mua ky është çmimi i parë dhe ndihem tejet i vlerësuar. Kjo do të ishtë e pamundur pa ndihmën e bashkëlojtarëve dhe shtabin teknik, andaj shfrytëzoi rastin t’i falënderoj për bashkëpunimin. Këtë edicion e kemi nisur mbarë ndonëse kemi ndërtuar një ekip pothuajse të ri. Na duhet akoma kohë që të komponohemi për të paraqitur në fushën e gjelbër më të mirën tonë. Atmosfera në ekip është e mirë dhe besoj që performanca jonë do të na dërgojë sa më lart në renditje”, ka thënë Ilir Blakçori për faqen e FFK-së.
