F.B.
Deputetja e Partisë Demokratike të Kosovës, Eliza Hoxha me rastin e 8 Marsit – Ditës së Gruas, tha se në Kosovë ka hapësirë të mjaftueshme për të festuar me rastin e kësaj dite, sikurse edhe për të protestuar. Hoxha e cila është anëtare e Komisionit për Barazi Gjinore në Kuvend, tha se në Kosova ka ligje që garantojnë barazinë gjinore, por duhet respektim më rigoroz i tyre.
Sipas saj, në Kosovë duhet të manifestohet brengat, sfidat, problemet që gratë i përjetojnë në jetën publike, por jo vetëm, por edhe në shtëpi.
“Duhet të diskutohet për hapësirat e reja të komunikimit e dialogimit dhe për hapësira të sigurta ku gratë kanë mundësi me i nda mendimet e tyre dhe tregimet tyre, qofshin ato edhe nga më të dhimbshmet, në mënyrë që të ketë mundësi të interpretohen përmes ligjeve të reja”, tha ajo.
Po ashtu Hoxha kërkoi që nëpërmjet amendamentimit të ligjeve, barazia gjinore të mos jetë vetëm në letër, por edhe të zbatohet.
Hoxha tha se problemi thelbësor është se në Kosovë vazhdon të jetë sfida e profesioneve që janë të perceptuara si profesione për gra dhe profesione për burra.
“Kemi shumë gra që i kanë thyer barrierat që kanë dalë përtej vijës së kuqe dhe kanë dalë përtej kutisë me shumë sfida, me shumë paragjykime, gjykime dhe çka do qoftë tjetër për ta bërë ëndrrën e tyre realitet”, tha ajo duke theksuar se prandaj edhe duhet të festohet 8 Marsi.
Ajo tha se funksionimi i përgjithshëm institucional duhet të funksionojë më mirë, në mënyrë që gratë të kenë më shumë mundësi në proceset e vendimmarrjes në kuvende komunale dhe në Kuvend të Kosovës.
