Deputeti nga radhët e Lidhjes Demokratike të Kosovës, Avdullah Hoti, ka deklauar se tenderët njëburimor janë rritur si kurrë më parë.
Ai i është referuar një raporti të Bashkimit Evropian, ku thuhet se 21% e prokurimeve janë kryer përmes negocimit pa procedurë të hapur tenderuese.
Sipas tij, shteti po paguan më shtrenjtë krahasuar me tenderimin e hapur me shumë oferta.
Ai ka kërkuar që të të ndërmerret një auditim gjithëpërfshirës për këtë çështje, si dhe të aktivizohen mekanizmat e hetimit parlamentar për të ekzaminuar këtë problem, “i cili potencialisht po i kushton buxhetit miliona euro humbje”.
“Tenderët njëburimor janë rritur si kurrë më parë. Raporti i BE-së thekson se 21% e prokurimeve janë kryer përmes negocimit pa procedurë të hapur tenderuese. Vlera e kontratave të nënshkruara me negocim është 78 milionë euro, apo 14% e gjithë vlerës së kontratave të nënshkruara. Me siguri shumë të madhe, shteti po paguan më shtrenjtë krahasuar me tenderimin e hapur me shumë oferta”, ka shkruar Hoti.
Ai ka përmendur edhe numrin e lartë të ankesave që po dorëzohen në Organin Shqyrtues të Prokurorimit.
Hoti ka thënë se “Është e pakuptueshme që nuk aktivizohet plotësisht prokurimi elektronik i instaluar që nga Qeveria Mustafa, i cili duhet të lidhet me të gjitha sistemet në institucione të ndryshme për të siguruar transparencën e plotë”.
Avdullah Hoti
Çfarë po ndodh me prokurimin publik në Kosovës në vitet e fundit?
1. Tenderët njëburimor janë rritur si kurrë më parë. Raporti i BE-së thekson se 21% e prokurimeve janë kryer përmes negocimit pa procedurë të hapur tenderuese. Vlera e kontratave të nënshkruara me negocim është 78 milionë euro, apo 14% e gjithë vlerës së kontratave të nënshkruara. Me siguri shumë të madhe, shteti po paguan më shtrenjtë krahasuar me tenderimin e hapur me shumë oferta.
2. Numri i ankesave që ofertuesit dorëzojnë në Organin Shqyrtues të Prokurimit është shumë i lartë, rreth 1,200 ankesa brenda vitit. Shumë prej ankesave miratohen, duke i detyruar institucionet publike të rivlerësojnë ofertat, apo të anulojnë aktivitetin e prokurimit. Pasojat e kësaj janë investimet kapitale më të ulëta historikisht në Kosovë. Është e pakuptueshme që nuk aktivizohet plotësisht prokurimi elektronik i instaluar që nga Qeveria Mustafa, i cili duhet të lidhet me të gjitha sistemet në institucione të ndryshme për të siguruar transparencën e plotë.
Prandaj, është tepër e nevojshme që: (i) fillimisht të ndërmerret një auditim gjithëpërfshirës për këtë problematikë, si dhe (ii) të aktivizohen mekanizmat e hetimit parlamentar për të ekzaminuar këtë problem, i cili potencialisht po i kushton buxhetit miliona euro humbje.
