Nënkryetari i Lidhjes Demokratike të Kosovës, Lutfi Haziri përmes një postimi në Facebook ka kritikuar Qeverinë aktuale për disa vendime të marra, sipas tij, në kundërshtim me Kushtetutën e Kosovës.
Dhe, për Hazirin, kjo është shqetësuese.
“Në 15-vjetorin e ratifikimit të Kushtetutës së Republikës, aktit më të lartë juridik të shtetit, fatkeqësisht e kemi një Qeveri që brenda dy viteve ka nxjerrë vendime anti-kushtetuese në disa raste dhe kjo është tepër shqetësuese”, ka shkruar Haziri në Facebook.
Sipas tij, në 15-vjetorin e ratifikimit të Kushtetutës së Kosovës qeveria po ashtu nuk ka zbatuar disa vendime të Gjykatës Kushtetuese.
“Po ashtu, nuk kanë zbatuar një numër të vendimeve të Gjykatës Kushtetuese. Politikëbërësit duhet ta kenë Kushtetutën si udhërrëfyes për vlerat demokratike e parimet udhëheqëse, ndërkaq qytetarëve u garantohet liria me të drejta të barabarta për secilin”, shkruan Haziri.
“Nuk e harrojmë thirrjen gjithë-popullore nga koha e rezistencës dhe kryengritjes politike: Republikë, Kushtetutë, ja me hatër ja me luftë”, ka shkruar Haziri në Facebook.
