F.B.
Kandidati i PDK-së për kryeministër, Bedri Hamza ka nisur vizitën zyrtare në SHBA.
Hamza ka takuar Asistentin Special të Presidentit Joe Biden, Ambasadorin Michael Carpenter, që njëherësh është Drejtor i Lartë për Evropë në Këshillin për Siguri Kombëtare, si dhe me Drejtoreshën për Ballkan dhe Evropë Qendrore, Kathleen Larkin.
Ai tha se nga këto takime ka marrë një mesazh të qartë nga SHBA-ja.
“Mesazhi që mora ishte i qartë: SHBA qëndrojnë pranë nesh dhe mbështesin pavarësinë, sovranitetin dhe integritetin territorial të Kosovës”
“Ne u pajtuam që tani është koha për progres në konsolidimin e Kosovës drejt njohjes nga pesë shtetet anëtare të BE-së, të cilat ende nuk e kanë njohur pavarësinë e Kosovës, drejt sigurimit të udhërrëfyesit për anëtarësim të Kosovës në Partneritet për Paqe dhe përfundimisht në NATO e BE. Këto janë qëllimet strategjike për të cilat folëm gjerësisht. Unë prezantova shkurtimisht vizionin dhe planin tim që Kosova të lëvizë më shpejt përpara drejt zhvillimit ekonomik, rritjes së pagave në sektorin publik, investimeve kapitale dhe rritjes së mirëqenies së qytetarëve”, ka thënë Hamza.
Ai shtoi se për realizimin e të gjitha këtyre qëllimeve, partneriteti me SHBA-në është i rëndësisë jetike dhe për Kosovën e mua edhe i pazëvendësueshëm.
