Afrika Perëndimore kërcënon me forcë udhëheqësit e grusht shtetit në Niger, pas sulmit ndaj ambasadës franceze në kryeqytetin Niamey.
Vendet e Afrikës Perëndimore vendosën sanksione dhe kërcënuan me forcë të dielën nëse udhëheqësit e grushtit të shtetit në Niger nuk arrijnë të rikthejnë presidentin e rrëzuar Mohammed Bazoum brenda një jave, ndërsa mbështetësit e juntës sulmuan ambasadën franceze në Niamey.
Përgjigja e Komunitetit ekonomik të vendeve të Afrikës Perëndimore i njohur si ECOWAS që përbëhet nga 15-vende ndaj grushtit të shtetit të shtatë të viteve të fundit në rajonin Sahel erdhi ndërsa turmat në kryeqytetin e Nigerit, Niamey, dogjën flamujt francezë dhe gjuajtën me gurë misionin e ish-fuqisë koloniale.
Mijëra demonstrues kërkuan largimin e trupave ushtarake franceze nga vendi, katër ditë pas fillimit të grushtit shteti që solli në pushtet juntën ushtarake.
Në një samit urgjent në Nigeri për të diskutuar grushtin e shtetit të javës së kaluar, udhëheqësit e Komunitetit Ekonomik të Shteteve të Afrikës Perëndimore kërkuan rivendosjen e rendit kushtetues, duke paralajmëruar për hakmarrje nëse kjo nuk ndodhë.
“Masa të tilla mund të përfshijnë përdorimin e forcës”, thuhet në komunikatën e tyre, duke shtuar se zyrtarët e mbrojtjes do të takohen menjëherë për këtë qëllim.
Presidenti i Çadit, Mahamat Idriss Deby, i cili erdhi në pushtet në vitin 2021 pas një grusht shteti, u takua me homologun e tij nigerian Bola Tinubu në periferi të samitit dhe doli vullnetar për të folur me udhëheqësit ushtarakë në Niger, sipas burimeve të agjencisë së lajmeve Reuters.
ECOWAS dhe Unioni Ekonomik dhe Monetar i Afrikës Perëndimore me tetë anëtarë thanë se kufijtë me Nigerin do të mbyllen me efekt të menjëhershëm, fluturimet tregtare do të ndalohen, transaksionet financiare do të ndalen, asetet kombëtare do të ngrihen dhe ndihma do të përfundojë.
