Zyrtari i AAK-së, Ardian Gjini, është përplasur në emisionin Pressing në T7 me gazetarin Lirim Mehmetaj.
Debati ndodhi pasi që Gjini tha se AAK e inkurajon Qeverinë që të pranojë planin franko-gjerman, pasi që pas tij mund të mos ketë opsione më të mira për Kosovën. Këtu ndërhyri Mehmetaj i cili pyeti Gjinin se ku e sheh të mirë këtë marrëveshje.
“Nuk kemi nevojë të lëshohemi në interpretime të deklaratave as të amerikanëve e as të të tjerëve për mu kriju një ide se a është e mirë apo jo marrëveshja. AAK ka ekip besoj dhe e keni bërë analizën. Ju keni qenë në takim. Marrëveshja nuk parasheh njohje. Nuk parasheh anëtarësime ndërkombëtare. Parasheh implementim të marrëveshjeve të kaluara. Më trego se ku e sheh të mirë këtë marrëveshje”, tha ai.
Gjini i kujtoi Mehmetajt deklaratat e Kurtit për marrëveshjen e Rambujes dhe shpalljen e pavarësisë.
“The disa gjëra përnjëherë, por tash po të përgjigjem. I njëjti person që dikur thoshte se nuk ka njohje nga Amerika, nuk është e mirë marrëveshja e Rambujes. Më 1 shkrut 2007 tha se nuk ka garanci nga Amerika për njohje. Ku jemi sot”, tha Gjini.
“Po nuk po më përgjigjesh. Ku është e mira?”, ia ktheu përsëri Mehmetaj.
Këtu Gjini i kërkoi që të mos i ndërprente fjalën më.
“Je shumë i ri për mua a po merr vesh. A më ke thirr në provim mua apo cka? Unë po përfaqësoj diçka këtu dhe ti nuk më ke thirrë në provim mua. A po merr vesh? Kurrë nuk qes fjalë palidhje në studio. Nuk dua të ndërpritem pa e përfunduar as një fjali”, përfundoi ai.
