Në Gjilan ka filluar 33 vjetori i manifestimit tradicional “Flaka e Janarit”, që iu kushtohet heronjve të kombit Rexhep Mala, Nuhi Berisha, Jusuf e Bardhosh Gërvalla dhe Kadri Zeka. Flakadanin e “Flakës 2024” e kanë ndezur kryetari i komunës së Gjilanit, Alban Hyseni bashkë me familjarë të heronjve Rexhep Mala e Nuhi Berisha, si dhe zyrtarë institucionalë.
Hyseni shprehu kënaqësinë që po fillon manifestimi “Flaka e Janarit 2024”, duke e cilësuar manifestim unik për nga struktura përmbajtjesore në mbarë hapësirën shqiptare e më gjerë.
“Po fillojmë këtë manifestim në 40-vejtorin e vrasjes së dy heronjve tanë, Rexhep Mala e Nuhi Berisha; atëbotë Rexhep Mala 33-vjeçar e Nuhi Berisha 23 vjeçar. Ata në shtetrrethim të paparë ndonjëherë luftuan kundër forcave që ishin pakrahasimisht më të shumta në numër dhe më të pajisura me armatime, duke rezistuar dy ditë rresht, për t’u bërë të përhershëm e përgjithmonë pjesë e kujtesës sonë kolektive, si dhe për të përforcuar me gjakun e tyre rrugën e lirisë e cila do të kulmonte në vitin 1999 me çlirimin e Kosovës”, tha ai.
Hyseni vuri në dukje më tej peshën, rëndësinë dhe jehonën që ka dhe do të ketë ndër breza manifestimi “Flaka e Janarit…”, njofton zyra për Informim e Komunës së Gjilanit.
“Ky manifestim, përveç si aktivitet kulturor e artistik ka vlerën edhe të historisë e peshën e madhe të barrës që duhet të bartin brezat që vijnë më pas, për rrugët që kanë trasuar dhe përgatitur për ne, e sidomos për ata që bartin sot përgjegjësitë publike, që të vazhdohet ajo rrugë të jetë e ndershme dhe të punohet me përkushtim të madh për të sjell vendin tonë e popullin tonë në një gjendje më të mirë për vitet që vijnë e kohën që na pret”, dekalroi Hyseni.
Në ceremoninë e ndezjes së flakadanit, Hyseni apeloi tek artdashësit që të kontribuojnë që “Flaka e Janarit”, të jetë një manifestim me vlerë artistike, por edhe kombëtare e historike, veçmas për Gjilanin, sikurse edhe gjithë vendit tonë.
Në fund të ceremonisë hapëse të manifestimit “Flaka e Janarit 2024” me ndezjen simbolike të flakadanit, të pranishmit vizituan dhe panë nga afër ekspozitën me fotografi e video, të titulluar “Flaka ndër vite”, e të hapur enkas, si dhe u shoqëruan me pika të zgjedhura artistike nga artistja Arzie Jusufi.
