Ministrja e Punëve të Jashtme dhe Diasporës, Donika Gërvalla gjatë qëndrimit të saj në Tokio, ka takuar drejtuesit e Agjencisë Japoneze për Bashkëpunim Ndërkombëtar (JICA) dhe Bankës Japoneze për Bashkëpunim Ndërkombëtar (JBIC).
Sipas komunikatës nga kjo ministri, donacionet dhe investimet japoneze në Kosovë kanë qenë temat kyçe gjatë takimit.
“Gjatë takimit në zyrat qendrore të JICA-s, Ministrja Gërvalla falënderoi drejtuesit e kësaj agjencie për mbështetjen e dhënë Kosovës ndër vite në rindërtim, ngritje të kapaciteteve humane dhe infrastrukturore, mbrojtje të mjedisit, menaxhim të mbeturinave dhe në fushën e përmirësimit të ajrit”, thuhet në komunikatë.
Tutje theksohet se ministrja ka vë në pah potencialin në fushën digjitale dhe të teknologjisë informative, si përparësi të rëndësishme të të rinjve, të cilat mund të shërbejnë si një mundësi e mirë e investimeve strategjike japoneze në Kosovë, në ngritjen e punësimit dhe perspektivës së të rinjv.
“Bashkëpunimi i metejshëm në projekte të reja që kanë për synim zhvillimin ekonomik të Kosovës, shkëmbimin e studentëve dhe përvojave në fusha të caktuara, ishte fokusi i këtyre takimeve që Ministrja Gërvalla realizoi gjatë vizitës së saj zyrtare në Japoni”, vazhdon komunikata.
