Menjëherë sapo ka kaluar faza e parë e shqyrtimit të aplikimit të Kosovës për anëtarësim në Këshillin e Evropës, lajm i bërë i ditur nga ministrja e Punëve të Jashtme dhe Diasporës së Kosovës, Donika Gërvalla, kanë nisur urimet e zyrtarëve të ndryshëm.
Mes tyre janë edhe deputetët e pozitës dhe opozitës të Kuvendit të Kosovës që aktualisht ndodhen në Strasburg të Francës, duke ndjekur nga afër këtë proces.
Deputetët Arben Gashi i LDK-së, Besnik Tahiri i AAK-së, Ariana Musliu – Shoshi nga PDK dhe deputeti turk Enis Kervan, që janë edhe anëtarë të Komisionit parlamentar për Punë të Jashtme të Kuvendit të Kosovës, kanë publikuar një fotografi duke ngritur të gjithë bashkë dolli, për këtë sukses të Kosovës.
“Bashkë festojmë”, ka shkruar deputeti Gashi, krahas fotos në facebook.
Me më shumë se 2/3 e votave, komiteti i Ministrave të KiE-së, ka marër vendim që t’ia përcjellë Asamblesë Parlamentare të Këshillit të Evropës, kërkesën për anëtarësim të Republikës së Kosovës.