F.B.
Skuadra e Dukagjinit është nisur në mbrëmjen e së martës për të mbërritur vetëm gjatë ditës së sotme në Gjibraltar, në një udhëtim mjaft të gjatë.
Atje klinasit do ta zhvillojnë ndeshjen kthyese ndaj FC Europas në rrethin e parë kualifikues të Ligës së Konferencës.
Në sfidën kthyese, të besuarit e Armend Dallkut do të hyjnë me epërsinë prej 2:1 të krijuar para një jave në stadiumin “Fadil Vokrri” në Prishtinë.
Falë golave të Bujar Shabanit dhe Iljasa Zulfiut, klinasit kanë avantazh para ndeshjes së kthimit.
Qëllimi i ekipit kosovar është të mos pësojë humbje dhe të kalojë në rrethin e dytë të Ligës së Konferencës.
E në rast kualifikimi, në rrethin e dytë do të përballen me skuadrën kroate, Rijeka.
Kujtojmë se kjo është hera e parë që Dukagjini merr pjesë në garat evropiane.
Përballja mes FC Europës e Dukagjinit do të zhvillohet të enjten, me fillim në orën 17:00.
