Edhe pak orë na ndajnë nga ceremonia e nisjes së Festivalit të Këngës në Radio Televizionin e Kosovës.
Nga muzicientë të ndryshëm, themelimi i këtij festivali është cilësuar si ngjarje historike për Kosovën dhe të ardhmen e saj drejt garës në “Euro Song Contest” atëherë kur rrethanat ta mundësojnë një gjë të tillë.
I cilësuar si festë më shumë sesa garë, edicioni i parë i Festivalit të Këngës, do të nisë në RTK duke filluar nga ora 21:00, ndërkaq paraprakisht në tapetin e kuq do të priten mysafirët dhe publiku.
Pas orës 23:00 pritet të fillojë transmetimi i programit “Post Festival”, i cili vjen për dy netët e para të festivalit dhe ditën e diel në një termin tjetër televiziv si komentim i ngjarjes në formë paneli.
Përveç në RTK1, RTK2, Radio Kosova 1, Festivali i Këngës do të transmetohet edhe në uebfaqen rtklive.com, e cila është e qasshme edhe jashtë kufijve të Kosovës.
Gjithashtu Festivali i Këngës do të transmetohet edhe në Radiotelevizionin Shqiptar dhe Radiotelevizionin e Maqedonisë së Veriut, në kanalin e dytë.
