F.B.
Martina Perez përjetoi një triumf të jashtëzakonshëm teksa kaloi vijën e finishit si kampione e parë olimpike në stafetën e përzier në ecje sportive, bashkë me Alvaro Martin.
Ekipi spanjoll arriti një kohë mbresëlënëse prej 2 orë, 50 minuta e 31 sekonda, duke fituar medaljen e artë në ‘Paris 2024’.
Ekuadori mori vendin e dytë me një kohë prej 2 orë, 51 minuta e 22 sekonda, ndërsa Australia përfundoi në vendin e tretë në këtë disiplinë të re, e cila u përfshi për herë të parë në programin olimpik.
Stafeta mikse në ecje sportive, e zhvilluar në distancën e maratonës, zëvendësoi garën e mëparshme në 50 kilometra. Çdo ekip përbëhej nga dy atletë që së bashku kaluan 42 kilometra e 195 metra. Fillimisht, atletët meshkuj ecën 11.45 kilometra, pastaj atletet femra përshkuan 10 kilometra. Në ciklin e tretë, atletët meshkuj sërish ecën 10 kilometra, ndërsa në fazën përfundimtare, atletet femra përshkuan 10.745 kilometra.
