Pas Elbert Krasniqit ka reaguar edhe zëvendësministri i Infrastrukturës, Hysen Durmishi lidhur me lajmin e hetimeve të pesë ministrave të Qeverisë Kurti nga Task-Forca antikorrupsion në Policinë e Kosovës. Durmishi ka thënë se le të hetojnë çfarëdo që nga dita e parë e punës së tij.
“Ka kaluar një vit e katër muaj prej kur kemi filluar me aplikimin e tiketave ngjitëse me zero kosto për qytetarët. Si rezultat i saj dhe masave tjera sot automjetet e paregjistruara në Kosovë kanë rënë nën pragun prej 5%. Ky ka qenë kriteri kryesor për kartonin e gjelbërt. Tashmë i kemi plotësuar të gjitha kriteret teknike dhe jemi në rrugë të mbarë që të bëhemi pjesë e kartonit të gjelbërt”, ka shkruar Durmishi në rjetin social Facebook.
Tutje zëvendësministri i Infrastrukturës ka thënë se nuk ka bërë asnjë shkelje ligjore dhe se rezultatet janë të matshme.
Kujtojmë, se një ditë më parë në medie është raportuar se pesë ministra të Qeverisë së Kosovës dhe zëvendësministri Durmishi janë duke u hetuar nga Task-Forca për korrupsion. Durmishi thuhet se po hetohet në lidhje me tenderin e tiketave.
