F.B.
Personi që njohu nga afër e më pas edhe përmblodhi në 19 libra biografinë, jetën dhe veprën e Shën Nënë Terezës, është Don Lush Gjergji. Ai sot me rastin e 45-vjetorit të Çmimit Nobel për Paqe, do të promovojë veprën “Porositë e Shën Nënë Terezës për ne”.
Në “Mirëmëngjesi Kosovë”, ai ka bërë të ditur se vepra do të përmbledh 45 porosi të humanistes shqiptare, e cila do të promovohet në Akademinë e organizuar nga Ipeshkvinë Prizren-Prishtinë në bashkëpunim me ITSHKSH.
“Nëna Terezë ishte e madhe, mishërimi i traditës, kulturës dhe qytetërimit tonë, ilir, arbër dhe shqiptar. Mbi të gjitha ishte universalizmi i saj, ajo kalonte çdo kufij kohor, hapësinor, gjuhësor, kombëtar e fetar. Për nënën Terezë njerëzit ishin vëllezër apo motra”, ka thënë Don Lush Gjergji.
Ai tha se kjo figurë globale është pasuri kombëtare. Dha porosi se vetja dhe rrënjët kuptohen përmes fushëveprimtarisë së saj.
Kjo akademi do të bëjë hapjen zyrtare të “Ditëve të Nënë Terezës 2024”, që do të zgjasin deri më 5 shtator. Akademia do të ketë shtrirje në Kosovë, Shqipëri e Maqedoni të Veriut.
