Kryeministri në detyrë, Albin Kurti tha se janë të interesuar që të ecin përpara me formimin e institucioneve “menjëherë”, pavarësisht se dje nuk i kishin 61 vota për ta kaluar një raport të komisionit të përkohshëm për verifikimin e mandateve në seancën konstituive të Kuvendit.
Ai i bëri këto komente në mbledhjen e sotme të Qeverisë, ku pati akuza për partitë e tjera jopartnere për bllokimin e seancës për konstituimin e Kuvendit.
“Si fitues të padiskutueshëm të zgjedhjeve të 9 shkurtit 2025 jemi shumë të interesuar që të ecim përpara drejt formimit të institucioneve të legjislaturës së nëntë, edhe atë sa më parë – menjëherë”, tha ai.
Kurti tha se si Qeveri në detyrë janë “shumë të vëmendshëm” dhe “të përgjegjshëm” që të mos lejojnë “vakum institucional”, siç tha, “jo për një ditë, jo për një orë, por as për një minutë të vetëm”.
“Përkundër thirrjeve të papërgjegjshme opozitare dje për pezullim të shtetit, shteti funksionon”, tha Kurti.
Seanca konstituive e Kuvendit dje nuk vazhdoi më shumë se deri te procesi i votimit të raportit të komisionit të përkohshëm parlamentar për verifikimin e kuorumit dhe të mandateve. 52 deputetë votuan për këtë raport, 46 kundër dhe 11 abstenuan.
PDK-ja, LDK-ja dhe AAK-ja votuan kundër këtij raporti, pasi thanë se ndryshe do ta shkelnin ligjin. Thanë se Albin Kurti dhe anëtarët e tjerë qeveritarë që janë zgjedhur deputetë do të duhej të jepnin dorëheqje paraprakisht, sipas ligjit të ri për Qeverinë.
LVV-ja pretendoi se në komisionin e përkohshëm u paraqit një letër e dorëheqjes së Kurtit nga posti i kryeministrit, por këto parti nuk e konsiderojnë akt të njëmendtë dorëheqjeje. Në fakt kështu mendojnë edhe shumë juristë.
Deputetët e Nismës u panë duke votuar për raportin e prezantuar në Kuvend, por ende askush nga LVV-ja nuk i është përgjigjur pyetjes se si nuk i pati Kurti 61 votat e nevojshme në këtë rast?
