Shefi i EULEX’it Giovanni Pietro Barbano dhe ambasadori i SHBA’së në Kosovë, Jeffrey Hovenier, thanë se tre policë serbë të saporekrutuar kanë dhënë dorëheqje. Këtë gjë nuk e kanë konfirmuar nga Policia e Kosovës akoma.
Shefi i EULEX’it, Giovanni Pietro Barbano tha se është i shqetësuar me dorëheqjen e tre policëve serbë nga Policia e Kosovës.
Ai shkroi se këto zhvillime shqetësuese po i ndjekin nga afër dhe tha se përbërja e policisë duhet të jetë përfaqësuese e komuniteteve që jetojnë në Kosovë.
“Po i shoh me shqetësim dorëheqjet e fundit të tre serbëve të Kosovës të saporekrutuar, pjesëtarëve të Policisë së Kosovës. EULEX po i ndjek nga afër këto zhvillime shqetësuese. Përbërja e policisë duhet të pasqyrojë dhe përfaqësojë shoqërinë të cilës i shërbejnë dhe mbrojnë”, tha ai.
Barbano shtoi se anëtarët joshumicë të Policisë së Kosovës mund të kontribuojnë në sigurinë e komuniteteve të tyre përmes punës të orientuar nga komuniteti.
“Misioni është i përkushtuar të mbështesë përpjekjet e PK-së që synojnë zhvillimin e policimit efektiv, efikas, përfaqësues dhe të përgjegjshëm në fushëveprim më të gjerë”, ka shkruar ai.
Ndërsa, ambasadori Hovenier tha se Policia e Kosovës ekziston për t’iu shërbyer të gjitha komuniteteve.
“Siç kam thënë shumë herë, Policia e Kosovës ekziston për t’iu shërbyer të gjitha komuniteteve në Kosovës dhe policët e saj duhet të jenë në gjendje të punojnë të lirë nga intimidimi”, ka shkruar ambasadori Hovenier.
Ai ka thënë se janë duke e përcjellë këtë situatë nga afër.
