F.B.
Dhjetëra të vdekur dhe mijëra qytetarë kanë mbetur pa energji për shkak të motit të ashpër, i cili ka përfshirë disa shtete të SHBA-së, e sipas parashikimeve moti i keq do të vazhdojë edhe muajin e ardhshëm. Disa vende kanë shpallur gjendje të jashtëzakonshme.
Pothuajse 200 000 persona në disa shtete amerikane kanë mbetur pa energji elektrike si pasojë e stuhive dhe tornadove vdekjeprurëse. Moti i keq e i ashpër la të vdekur së paku 23 njerëz gjatë fundjavës.
Meteorologët po vazhdojnë të paralajmërojnë për stuhi të forta dhe përmbytje në pjesët veriore dhe qendrore të Teksasit.
Ndërkohë, zonat jugore të vendit janë përfshirë nga nxehtësia ekstreme, siç është edhe jugu i Floridës. Edhe pse kjo nxehtësi po zvogëlohet gradualisht, nivelet gati rekord mbeten të mundshme, thotë Shërbimi Kombëtar i Motit. Në Kentaki më shumë se 80 000 shtëpi janë prekur nga ndërprerjet e energjisë elektrike, sipas monitoruesve.
Vdekje të lidhura me motin janë raportuar edhe në disa shtete të tjera gjatë ditëve të fundit, duke përfshirë tetë në Arkansas, shtatë në Teksas, dy në Oklahoma, pesë në Kentaki dhe një në Alabama.
Presidenti Joe Biden bisedoi me guvernatorët e çdo shteti të prekur nga stuhitë dhe ofroi ndihmë federale. Një gjendje e jashtëzakonshme është shpallur nga guvernatori i Kentakit, Andy Bashear, duke përmendur “stuhitë shkatërruese që goditën pothuajse të gjithë shtetin”.
Parashikuesit e qeverisë e kanë përshkruar këtë verë si një sezon ndoshta të jashtëzakonshëm të stuhive të Atlantikut 2024, duke filluar muajin e ardhshëm.
