Një shtetase e Argjentinës 27-vjeçe ka vdekur në QKUK për shkak të lëndimeve të marra të cilat dyshohet se i janë shkaktuar si pasojë e rënies nga kati i gjashtë i një hoteli në Fushë Kosovë. Gazeta Express mëson se i dyshuari është shqiptar, me nënshtetësi zvicërane.
Rasti në polici është hapur si “vrasje” dhe është arrestuar i dyshuari i cili ka qenë duke qëndruar së bashku me viktimën. I njëjti me vendim të prokurorit është dërguar në mbajtje.
Gjykata Themelore në Prishtinë tashmë ia ka caktuar një muaj paraburgim të dyshuarit, në drejtim të veprës penale “vrasje”.
Lajmin e ka konfirmuar për Gazetën Express zëdhënësja e Gjykatës Themelore të Prishtinës, Mirlinda Gashi.
Ajo tha se pas kërkesës së prokurorisë, të njëjti i është caktuar masa e paraburgimit prej një muaji.
Motivi i vrasjes nuk dihet, ndërsa trupi i pajetë i viktimës është dërguar në IML për obduksion.
Policia ka njoftuar se kjo ngjarje ka ndodhur me datën 1 gusht rreth orës 01:59.
