As kryetari i LDK-së në Gjilan Lutfi Haziri, e as ai që aktualisht po e ushtron detyrën e kryetarit të PDK-së në këtë komunë, Riad Rashiti, nuk i janë përgjigjur ftesës për takim në zyrën e kryetarit të komunës, Alban Hyseni, për të gjetur zgjidhje rreth bllokadës për buxhetin e Gjilanit.
Këtë Hyseni e quajti bojkot e bllok që opozitarët, sipas tij, po i bëjnë buxhetit të qytetarëve.
“Pas javësh të tëra bllokade nga opozita dhe thirrjeve të mia të vazhdueshme drejtuar fillimisht asamblistëve të partive opozitare dhe më pas edhe kryetarëve të këshilltarëve komunalë, dje kam ftuar një takim urgjent për sot”, tha Hyseni.
Ai tha se të dy liderët komunal opozitarë i ftoi për të diskutuar buxhetin e komunës dhe ngërçin institucional me të cilin po përballen ata. Hyseni u ka bërë thirrje atyre për reflektim.
“Qytetarët e Gjilanit vlerësojnë drejt e nuk harrojnë. Po u bëjë thirrje përsëri, që të reflektoni e të përgjigjeni në kërkesën qytetare për votimin e buxhetit”, tha kryetari i Komunës së Gjilanit, Alban Hyseni.
