F.B.
Kombëtarja e Kosovës U19 për vajza ka arritur një fitore të ngushtë 1:0 në ndeshjen e saj të parë miqësore kundër Malit të Zi, e zhvilluar të mërkurën në Kampin Nacional në Hajvali.
Dardanet dominuan nga fillimi i takimit, duke krijuar shumë raste për shënim. Goli vendimtar erdhi në minutën e 28-të, kur Elona Paci shënoi golin e epërsisë, që doli të jetë edhe përcaktues për fitore.
Pavarësisht përpjekjeve të vazhdueshme të vajzave të trajneres Albina Rrahmani për ta shtuar avantazhin, ato nuk arritën të konkretizojnë rastet e krijuara. Mali i Zi kishte mundësi për të barazuar, por portierja kosovare, Djella Mehmeti, ishte në formë të shkëlqyer dhe e mbrojti portën me vendosmëri, duke siguruar që ndeshja të përfundonte me fitore për Kosovën.
Kombëtarja e Kosovës U19 do të ketë mundësinë për të vazhduar përgatitjet për kualifikimet e Euro 2025 dhe për të testuar formën e saj në ndeshjen e dytë miqësore kundër Malit të Zi, e cila do të zhvillohet të premten në orën 10:30.
